بنیم تک هیچ کیم زار و پریشان اولماسین ، یارب

بنیم تک هیچ کیم زار و پریشان اولماسین ، یارب
اسیر درد عشق و داغ هیجران اولماسین ، یارب

دمادم جؤورلردیر چکدیگیم بی رحم بوتلاردان
بو کافرلر اسیری ، بیر مسلمان اولماسین ، یارب

گؤروب اندیشه ی قتلیمده اول ماهی بودور دردیم
کی بو اندیشه دن اول مه ، پریشان اولماسین ، یارب

چیخارماق ائتسه لر تندن چکیب پئکانین اول سروین
چیخان اولسون دل مجروح ، پئکان اولماسین ، یارب

جفا و چؤور ایله معتادام ، آنلارسیز نولور حالیم ؟؟؟
جفاسینا حد و جؤورونه پایان اولماسین ، یارب

دئمن کیم عدلی یوخ یا ظلمو چوخ ، هر حال ایله اولسا
کؤنول تختینه اوندان غئیری سلطان اولماسین ، یارب

فضولی بولدو گنج عافیت عافیت مئیخانه کنجوندن
مبارک ملکدور ، اول ملک ویران اولماسین ، یارب