تبـــــــــــــریزیم

تازه داماد سایاق سن گوله ـ گوله،

یاخ پولاد اللرینه حنـا تبــــــریزیم

افتخار اوزوگون سال بارماغینا،

سن بورون آل ـ یاشیل دوْنا تبـــــــریزیم

ساغدوشون ستارخان، سوْلدوشون باقیر،

نبی‌نی هجری بو تویا چاغیر،

چوخ اولار قوناغین مجلیسین آغیر،

احسن بو شؤهرته شانا تبـــــــــریزیم

قوجا شهریارین دئسین بیر غزل،

عاشیقلار ایچره او، ازلدیر ازل،

اوغلانلارین ایگید، قیزلارین گؤزل،

اویلاقسان سلطانا ـ خانا تبـــــــریزیم

قوی عاشیق بو تویدا چالسین دیلغمی،

سن گولسن تالانار بوتون ائل غمی،

عندلیب چکسه ده چکر گول غمی،

محبّـــته آتــا ـ آنــــا تبـــــــــــــریزیم