سئویرم یوردومون باهارین یازین

سئویرم یوردومون باهارین یازین
گؤلونده نازلانان اؤرده یین قازین
عاشیغین الینده صدفلی سازین
ای عاشیق گل اوخو؛اوره ییم جانیم
سئویرم من سنی آذربایجانیم

داغلارین دؤشونده قاینایان سولار
سوزولر گولاب تک چوخورا دولار
گوللشر گوموش تک بیر آینا اولار
ای روحوم روانیم گؤزل جئیرانیم
سئویملی وطنیم؛ آذربایجانیم

چن-دومان ائیله ییپ باشیزدا مکان
گئجه نین اولدوزون آیینی توتان
توفانلار وئرنمز سیزلره تیکان
ای منیم داغلاریم؛ ویقاریم ؛ جانیم
گؤزللر گؤزلی آذربایجانیم

گوموشدن ساچ هورر اوجا داغلارین
یام یاشیل دون گئییر گوللو باغلارین
آل-الوان اوفوقلو آخشام چاغلارین
ای گؤزل وطنیم؛گؤزل ترلانیم
گؤزللیک مسکنی آذربایجانیم

'

واله ام بو جسور قهرمان ائله
عاشیقم بو شیرین بال کیمی دیله
دوشمنی یاندیرار دؤنده رر کوله
ای آنا دیاریم ؛ عشقیم ایمانیم
اولوبسان ویقاریم آذربایجانیم