آنا وطن‌‌‌، آنا وطن‌!

آبی روشن

قهرمانلار دیریله‌جک،
اؤنۆنده یاد اگیله‌جک،
اوغوللارین سئویله‌جک،
شن گله‌جک‌‌‌، تئز گله‌جک‌‌‌،
آنا وطن‌‌‌، آنا وطن‌!
عطیرلیدیر قوینون سنین‌‌‌،
گۆلـله‌نجک دره‌لرین‌!
گئده‌‌‌جکدیر دردین - غمین‌‌‌،
دیلکلریم آچار چیچک‌‌‌،
آنا وطن‌‌‌، آنا وطن‌!
یاد باغیریر یالان - یالان‌‌‌،
منه دئییر: بیزه اینان‌!
ائتمیر بونو اصلا گۆمان‌‌‌،
سندن اولماز هئچ ال چکمک،
آنا وطن‌‌‌، آنا وطن‌!
بولاقلارین سرین سنین‌‌‌،
چشمه‌لرین درین سنین‌‌‌،
اوجا ذیروه یئرین سنین،
ان گؤزه‌لسن‌‌‌، بونو بیلک،
آنا وطن‌‌‌، آنا وطن‌!
سن منیم‌سن‌‌‌، منیمکی‌سن‌‌‌،
سن بیر ایدین‌‌‌، بس ایکی‌سن‌؟
اۆره‌گیمده سن‌‌‌، تکی سن‌‌‌،
یئر دوتوبسان، بئله گره‌ک‌!
آنا وطن‌‌‌، آنا وطن‌!
گؤزه‌للیکده بیر دنه‌سن‌‌‌،
منجه، دۆنیا تکی سنسن‌‌‌.
آنجاق سنه باغلییام من‌‌‌،
صرف ائتمیشم بوردا أمک،
آنا وطن‌‌‌، آنا وطن‌!
داغلاریندا گۆل آچاجاق‌‌‌،
قیزیل گۆنش نور ساچاجاق‌‌‌.
ایشیغیندان قورد قاچاجاق‌‌‌،
او گۆنه گل کؤنۆل وئره‌ک،
آنا وطن‌‌‌، آنا وطن‌!
قان رنگینده بایراغین وار‌‌‌،
دۆنیالارجا نؤوراغین وار‌‌‌،
یاز نفسلی مین داغین وار‌‌‌،
من قویموشام بوردا اۆره‌ک‌‌‌،
آنا وطن‌‌‌، آنا وطن‌!