تورکجه یازیلی شئکیلئر

هارای

 

هارای یام یاشیل یارپاقلار یئره توکولور، گنجیمین گنجلیکده...
هارای
یام یاشیل یارپاقلار یئره توکولور، گنجیمین گنجلیکده بئلی بوکولور ، هئی قارداشیم هئی منیم

باجیم ...  هارای چکین آنامین هارای دیلی بوکولوب ... آناسیز - آتاسیز اوغوللو - قیزللی
 
ایندی مامان دئییب بابام چاغیریر یازیغیم گلیر بو اولکه میزه یازیغیم گلیر گنج ائلیمیزه  یئریمیز

یا قفه خانادی یادا خیاوان قیراغیندا کارتون یاتاغی . ذلیل گونلریمیزه یازیغیم گلیر هارای

چکین منیم سینمیش اوره گیمه ، سو سه پین منیم یانمیش دیله گیمه . هارای چکین بئش

یاشیندا اوغلانلارین الینده چکیلن سیگارالارا ، هارای چکین دیللی - دیلسیز مکتب لرده یانان

بالالارا ، هارای چکین فارس دیلنده دانیشماقلا کیلاس قویان قادینلارا ، هارای چکین میلیون

میلیون دیلسیز اینسانلارین یاساقلانمیش – قاندالانمیش– توتوقلانمیش دیل لرینه ، هارای

چکین بولوک - بولوک بولونموش ائلیمن قانلی اوره گینه ، هارای هارای هارای چکین هارای

چکین گوجلو گونلریمیزه ، آیدین گله جه ییمیزه ، ایشیق دولو سئوگیمیزه هارای هارای –

هارای هارای – هارای هارای من تورکم گله جک بیزمدیر

فارسی قیریلداتما دیلین وارسنین

فارسی قیریلداتما دیلین وارسنین

سن اگر بولبولسن گولون وارسنین
قهرمان خلقیمیز گؤزتیکیب سنه
فرهنگی تالانمیش ائلین وارسنین
سن گؤزه‌ل سوناسان هر سویا دوشمه
اوزمگه دوم دورو گؤلون وارسنین
اگر بولود اولسان یاغ قوراخلیقا
سویاحسرت قالمیش چؤلون وارسنین
«یاغ اولوب یاندیرما یادلار چیراغین
قارانلیق آیلارین، ایلین وارسنین»
دئمیرم فارسیجا یازابیلمیرسن
چوخ گؤزه‌ل یازیرسان الین وارسنین
آممانئجه دئییم فارسی‌دان گؤزه‌ل
قیلینج کیمی کسگین دیلین وارسنین
«سعدی»نی «حافظ»ی چوخدا ازدیرمه
«معجز» ون و ورغونون لعلی‌ن وارسنین
آرخالان بابکه رستم نه چی‌دیر؟
دانالار باسماقا کلین وارسنین
نسیمی،خطایی واقف، فضولی
دده قورقود» کیمی اولون وار سنین»
«اؤزه‌یئر» هابیلین سازین کامانین
بولبول چهچهه‌لی تئلین وارسنین
ایزین داش دؤورونه گئدیب یئتیشیب
سومئرلره باغلی تئلین وارسنین
سولور اؤز باغین‌دا گوللر، چیچک‌لر
وئرمه تیکان لارا گولون وارسنین
آی عاشیق چال اوخو آنا دیلین‌ده
سازین‌دا خوش بمین زیلین وارسنین
تورکو نغمه ایستیر یانیق کونلوموز
سدی ییخ قوی گه‌له سئلین وارسنین
پاشالار باغیندا بوقوللوق نه‌‌دیر؟
اونودمابیر «چنلی بئلین» وارسنین
شاعیرلر جوشدوران سولو،صفالی
آرازین، موغانین میلین‌وار سنین
وورولما یادلارین گؤزللرینه
ائلین ده چوخ اینجه بئلین وارسنین
سن یوگور میدانا«کور اوغلو» کیمی
مین لرله‌های باسان ده‌لین وارسنین
«دورنا» سان قاققیلداسس وئرسسیمه
قاطاردان آیریلما یولون وارسنین
اَلین وئر الیمه داغلار آشیراق
بیلیرم قدرتلی قولون وارسنین
«شامی» یم یالقیزام یوخدور کومگیم
گه‌ل اکک بو باغی بئلین وارسنین
دایانما شعریمین تئز وئر جوابین
اگر بومیداندا فعلین وارسنین

آغ آتیم

 

آغ آتیم

آغ آتیم ، قول قاناتیم ،
آت قدمین یورتمه یئری !
آش تپه لردن
سیلدیریم تک سره لردن
سئله سینمیش دره لردن
بو نه طوفاندی گؤزل کهلیگیمی ایستیر آییرسین فره لردن
غیرتیم جوشه گلیر غملی خبردن
آغ آتیم – قورخما خطردن !
آغ آتیم قول ، قاناتیم ،
شیهه چک ، قوی سسیوه
بلکه یاتانلاردا اؤیانسین
یاتماغین واختی دگیل دورسون اوتانسین
یاتانین عؤمرو تالانسین
تازا نعلین وار آتیم
چال بو داغین سینه سینه ، قوی پارالانسین
چال داغین سینه سی باتسین ، یارالانسین
داشی داشدان ، آرالانسین
آغ آتیم قول قاناتیم
داش قایادان آشما چتیندی
قاباق اؤز یوققوشادی ، قاشما چتیندی
داغا دیرماشما چتیندی
داشا ، سووخاشما چتیندی
باخما یوللاری چتیندی ، اورانین هیبتی یوخدور
آغ آتیم همت ائله !
غیرتی یوخدور
هله اؤز یوققوشالار چوخدو قاباقدا
آشماق اولماز بو آیاقدا
آغ آتیم قول قاناتیم
بسدی ایاق ساخلاما ، گون باتدی قارالدی
گون گئچیب داغ دالینا رنگی سارالدی
داغین اوستون دومان آلدی
آغ آتیم ، بس بو نه حالدی؟
بورا یارقاندی آتیم دورما آماندی ....
آغ آتیم ، قول قاناتیم
آت قدم آیدینلیغا ساری
هؤرکوشن اوولاریلان ؛ چیخ سره یاللاری یوخاری
قار قالان داغلارا سال بیر نفسین
قوی اریسین بوز کیمی چئگینینده کی قاری
سولاری آرخلارا سال بلکه سووارسین
قوری قالمیش اوبالاری
قوی بؤیوک گولده اؤزوشسونله یاشیل باش سونالاری
آغ آتیم
جهد ائله باری
سنی تاری !
آغ آتیم ، قول قاناتیم
طبعیمین دریاسی جوشقوندو
یئل اسدیر لپه لنسین
قوی چالیم صخره لره دالغامی ، دالغام سپه لنسین
قوی یاغیش تک قورویان
داغلارین اؤستونده اله نسین
هرزه اوتلاری آپارسین
لالا بیتسین
هامی گؤللر تزه لنسین
گؤلو بلبل یییه لنسین
آغ آتیم ، قول قاناتیم
آت قدمین قلعه ی بابکدن آشاق
قارا گؤنلن ساواشاق
آت گؤلوندن سس آتیب ، بابکین حالین سوروشاق
یئنه طوفاندا جوشاق
دریالار تک قوووشاق
آغ آتیم ، قول قاناتیم
شیهه چک قوی سسیوه
هاجرینی ترکینه چکسین نبی گلسین
قوی کور اوغلو آتینی داغلارا سالسین
ائشیدیب شیهه نی گلسین
الده کسگین قیلیجیلا
بویاسین قانه کئچل حمزه نی گلسین
قوی کرم سازینی سالسین دؤشونه ، چؤللره دؤشسون
های سسی ائللره دؤشسون
دئگیلن غملی کرم ایستر اگر ، اصلینی گلسین
دشمنین بلکه کسک نسلینی ، گلسین
قوی بو داغلاردا بؤیوک هلهله دؤشسون
داغلارا ولوله دؤشسون !
آغ آتیم ، قول قاناتیم
منه بیر قالغی بابامدان ، بو ورندیلدی ، بونو چئگنیمه ساللام
قاراداغ باشینی آللام
اورا بیر ولوله ساللام
آغ آتیم دورما ، یوبانسان ، دالی قاللام
آغ آتیم ، قول قاناتیم
بیز اگر قلعه ی سیمرغدان آشساق بیزه آزدی
باخما یوللار ناتارازدی
باخما بو قارلی دماوند ، بو قفقاز بو هرازدی
باخما داغدا هاوا دوتقوندو – آیازدی
باخما بو قیشدی بو یازدی
آغ آتیم آت قدمین دریا ، دایازدی
دریانی گئچسن اگر شهرِ نیازدی
اوردا هر قان کی تؤکولدو یئره ، آزادلیقی یازدی
بشر آزادلیغا بازدی !
آغ آتیم ، قول قاناتیم
اوردا دؤلبرچین اوتو دؤرت پَر آچیبدی
اوردا دیللنمگه دیل تازه شیرین دیللر آچیبدی
اوردا باغلاردا بوتون گؤل لر آچیبدی
آغ آتیم
آت قدم آیدینلیغا ساری !

آنا دیلیم

 

آنا دیلی -

بیز واریق وارسا وطن وارایسه دوغما دیلیمیز
اؤیره نیب بیلمه لیدیراؤز دیلینی تورک ائلیمیز

آنا تک جاندان عزیزدیر آنا تورپاق آنا دیل
حورمتین ساخلا یاشارکن آنالار قدرینی بیل

وطنین کیملیییدیر وارلیغینین داش تملی
کیملییین بایراغیدیر هر بالانین دوغما دیلی

آنا دیلدیر بزه ین دویغولارین اویلاغینی
سوسله ین آرزیلاری سئوگی سئوینجین باغینی

بولبول اؤز دوغما دیلیله گوله سویلر سؤزونو
هر گول اؤز رایحه سیله تانیدار اؤز اؤزونو

آنا دیلدیر داشییان لایلالارین جان دادینی
آنا دیلدیر یاشادان ائولادینین اؤز آدینی

آنا دیلدیر ائلینین تاریخی آیدین تانیغی
یوردونون اؤلکه سینین آیناسی سؤنمز چراغی

آنا دیلده آنانین سئوگیسی عطری دادی وار
آنا دیلده وطنین شانلی شرفلی آدی وار

قبریم اوسته گه‌لر اولسوز منه بیر ساز گتیرین

قبریم اوسته گه‌لر اولسوز منه بیر ساز گتیرین
حمدو رحمان یئرینه شور ایله شهناز گتیرین

فاتیحه ایستمیرم اؤزگه دیلیندن بئزارام
اؤز دیلیمده منه روح اوخشایان آواز گتیرین

عالیمین نغمه‌سینی، همده عدالت سازینی
بیرده هابیل کمانیندان منه ائجاز گتیرین

چونکی بیر فایداسی یوخ آغی دئییب آغلاماقین
اوخویون قوشما، گرایلی قیش اؤتوب یاز گتیرین

مئی ایچین تورپاغیمین اوستونه مستانه گلین
هم او مئیدن کی ایچنلر اونو دویماز گتیرین

قبریم اوستونده دوزون یان-یانا آل باده‌لری
نوش ائدین جومله‌سینی سیز یئنه‌ده آز گتیرین

او گؤزل حالتی وصف ائتمه‌ده عاجیزدی دیلیم
سئوگیدن نوشأت آلان بیر نئچه خوش سؤز گتیرین

ناز مؤقددسدیر اگر نازلی گؤزل صادیق اولا
ائی صداقتلی گؤزللر منه سیز ناز گتیرین

دوزدی من اؤلمزیدیم ائشوه-ناز اولدوردو منی
ائله بیر ناز کی آشیق جانینا قییماز گتیرین

آتا اولدوقدا کریم یاندی اوغول حسرتینه
چنلی بئلدن گؤروشه بیر دلی ائیواز گتیرین

یاسلی ساوالان

یاسلی ساوالان

هر زامانکی باخیرام باشینا قاروار گؤرورم
اوغلو اؤلموش آنا تک گؤزلرین آغلار گؤرورم
هر طرفدن چکیلیب سینه‌وه داغلار گؤرورم
آی آلان اوستونو غم چیسگینی، هر یانی دومان
آی یاغان باشینا غملر اودو، یاسلی ساوالان

گؤرموشوک یازدا کؤچک­لرده چیچکلر آچیلار
هر طرفدن چیمنین سینه­سینه گول ساچیلار
ماهنی­لار قوشماغا باشلار یئنه­ده قوشماچیلار
یاز گلیب گئتدی یئنه گولمه­دین اوچ آیدا بیر آن
آی یاغان باشینا غملر اودو، یاسلی ساوالان

قرنیلر کئچدی سنین گولمه­دی بیر لحظه اوزون
قانلی یاش تؤکدو سارالمیش اوزونه یاشلی گؤزون
غصّه­دن دؤندو قارانلیق گئجه اولدو گونوزون
نه سوران حالینی اولدو نه وئرن جیسمیوه جان
آی یاغان باشینا غملر اودو، یاسلی ساوالان

خالین کیمی خال اولماز گوزلیم

خالین کیمی خال اولماز گوزلیم
لب بالین کیمی بال اولماز گوزلیم
حالیم کیمی حال اولماز گوزلیم
خالینی اوپمه گه وئر بیر منه فرصت
گل قویما قالیم او خالینه حسرت

خومار گوزونه گوزومون قاره سی قوربان
قاره تئلینه اورگیم پاره سی قوربان
گول اوزونه دشت غم آواره سی قوربان
وار هر سوزومون دالسیندا بیر حکمت
گل قویما قالیم او خالینه حسرت

مه له رم بیر قوزو تک درد ، غم ایچینده
یاشیرام اوزگه بیر حالدا ، عالم ایچینده
یوخموش سنه بنزر بنی آدم ایچینده
چوخلو وئر عشقیمه سن ارزش و قیمت
گل قویما قالیم او خالینه حسرت

سن کی یوخسان ائله بیل جانیم آلیرلار
اورگیم دردینه درمانیم آلیرلار
جنت خیالیم دا کی قیلمانیم آلیرلار
عاشق اولوب دور سنه اهل خلقت
گل قویما قالیم او خالینه حسرت

محو تماشادیر عالم سنه ، هیچ دؤیا بیلمز
اهل ریا عشق ندیر ، هیچ دویا بیلمز
جایماز سندن باشقا کیمسه یه ، هیچ اویا بیلمز

چکمیشم سنه ال چاتدیرماغا مین کره زحمت

گل قویما قالیم او خالینه حسرت

آچ گؤزون قوی یوخودان گوللر اویانسین غزلیم

 

آچ گؤزون قوی یوخودان گوللر اویانسین غزلیم
آچ گؤزون قوی باخیشیندان گون اوتانسین غزلیم

گؤره بیلمز گؤزلیم آیدا اوزونده ن گؤزلین
باخ آیا قوی حسدینده ن پارالانسین غزلیم

سن اولان یئرده گولوم ! گول نئدی؟ دور گولشنی گز
قوی سنین باشیوا پروانه دولانسین غزلیم

چیخ چمن سئیرینه، مدهوش ائله سروی، سمنی
قوی آدین عطر کیمی باغدا جالانسین غزلیم

گون نئدی؟ آی نئدی؟ اولدوز نئدی؟ گؤیچکلر آدی
سن اولان یئرده گره کدیر قارالانسین غزلیم

قالمیشام قاشیوی، کیپریک لریوی، گؤزلریوی
قلمیم هانسینی وصف ائیله یه؟ هانسین؟ غزلیم!

سنی آغوشه چکنده اوره ییمده ن دئیه رم
اولا کاش دور زامان بوردا دایانسین غزلیم

یا دایانسین یادا هر لحظه نی هر ثانیه نی
بیر ایل اولسون، ایلی بیر عومر اوزانسین غزلیم

سنی هر کیم دیله چالسا، گؤروم آغزی قوروسون
گؤروم آغزیندا عومور کن دیلی یانسین غزلیم

ائلیمین غملری بسدیر منه، سن غم یئمه دای
قویما غم، غملرین اوستونده قالانسین غزلیم

آغلاما، غم یئمه قوی گوللر آچیلسین بالاجان
ائله گول کی قوی آتان غملری دانسین غزلیم

رحمتلیک استاد حسین منزوی

"Sən gəlməz oldun"

"Sən gəlməz oldun"


Sözlər ?
Bəstəkar Ələkbər Tağıyev

Deyirdin baharda görüşərik biz
Bahar gəldi keçdi, sən gəlməz oldun

Daşlaramı dəydə sındı əhdimiz?
Aylar, illər keçdi, sən gəlməz oldun

Sən gəlməz oldun, sən gəlməz oldun, sən gəlməz oldun, yarım
Gözləyirəm mən, gözləyirəm mən, gözləyirəm mən
Sən gəlməz oldun

Deyirdin qapına qonaram quş tək
Quşlar cəh-cəh vurdu, sən gəlməz oldun

Yaşamaq eşqi ilə vəcdə gərək
Quşlar yuva qurdu sən gəlməz oldun