سیزلاییر احوالیما صبحه قدر تاریم منیم
سیزلاییر احوالیما صبحه قدر تاریم منیم
تکجه تاریم دیر قارا گونلرده غمخواریم منیم
چوخ وفالی دوستلاریم واردیر، یامان گون گلجه یین
تاردان اوزگه قالماییر یار وفاداریم منیم
یئر توتوب غمخانه ده، قیلدیم فراموش عالمی
من تارین غمخواری اولدوم، تار غمخواریم منیم
گوزلریمه هر تبسم سانجیلیر نئشتر کیمی
کیپریگی خنجردی، آه، اول بی وفا یاریم منیم
آسمان آلدی کناریمدان آی اوزلو یاریمی
یاش توکر اولدوز کیمی بو چشم خونباریم منیم
ای بو غملی کونلومون تاب و توانی، سویله بیر
عهد و پیمانین نه اولدو، نولدو ایلغاریم منیم
"شهریار"م گرچی من سوز مولکونون سلطانی یم
گوز یاشیمدان باشقا یوخدور در شهواریم منیم
باشقا بیریسینی سئـوه بیلمزسن
باشقا بیریسینی سئـوه بیلمزسن
هله قلبیمیزده خاطیـــــــره ایزی
هله آیریلیغین نملی دیـــــر گؤزو
هلــه کی سئویریک بیرـ بیریمیزی
باشقا بیریسینی سئوه بیلمزســـن
گؤر نئچه نغمه نین بسته سی قــالیب
بو اوجاق سؤنوب سه توستوسو قالیب
الینده الیمین ایستـی سـی قــــالیب
باشقـا بیریسینی سئـــــوه بیلمزسن
اینجیدیب قلبیمــــه دیه بیلمیرسن
یولونو بیر یوللوق ایه بیلمیــــرسن
منه « یوخ » سؤزونو دئیه بیلمیرسن
باشقا بیریسینــی سئوه بیلمزســن
ایل کئچیر ، عؤمورده خاطیره قالیر
باهار گوللریمیز غنچه ده سولـــور
هلــه کی گؤزلرین منی آختاریــر
باشقـا بیریسینی سئـوه بیلمزسن
آخار گؤزوموزون یاشی قورومـــاز
دئییردیک بو ایلقار پئیمان پوزولماز
بئله سئوه ـ سئوه آیریلیق اولمــاز
باشقا بیریسینی سئوه بیلمزسن
