تبریزیم

تبریزیم
سنی نئچه-نئچه نغمه کار اؤتدو
سازیندا ، سؤزونده ، تبریزیم منیم
شهرتین اوجالدی ، آدین اوجالدی
بوتون یئر اؤزونده ، تبریزیم منیم
فقط طالعینده باهار آز اولدو
آرزون سینه ن اوسته قانلا یازیلدی
نرگیزین ، بنؤوشه ن نیسگیل لی قالدی
چؤلونده ، دؤزونده ، تبریزیم منیم
حیاتی واریدی کؤرپه گولونده
بیر بؤیوک دنیزین، بیر لال گؤلونده
انسان آخینیندا ، انسان سئلینده
چاغلادین اؤزون ده ، تبربزیم منیم
مین-مین یارا آلدین ، دیریلدین یئنه
آلقیش سینه نده کی حیات عشقینه
یولومدا بیر مشعل اولموشدور منه
کول آلتدا کؤزون ده ، تبریزیم منیم
ای منیم مقدس اومید شهریم
ای منیم قهرمان ، ایگیت شهریم
دی کیمی گؤسته ریم ، من نشان وئریم
اولسون سن دؤزومده ، تبریزیم منیم !!!
سنین اؤز آدین وار ، اؤز احتشامین
یئنه ده دوغاجاق آیلی آخشامین
اینانما دئسه لر ، ایسته گین ، کامین
قالاجاق گؤزونده تبریزیم منیم
آرزون ناخیش-ناخیش اومیدین رنگ رنگ
ائشیت ، گؤر نه دئییر بو قلبی کؤره ک :
نه اولار منی ده بیر خاطیره تک
سن یاشات اؤزونده ، تبریزیم منیم !!!
تبریزیم منیم ......

اوغوز بابام...

اوغوز بابام...

قیلینج لارین سسی گلدی

گئچمیشلردن ، اوزاقلاردان
آت کیشنه دی
((ایتی)) چایین قیراغیندا
اوغوز بابام قییها چکدی
غضبیندن یئره گؤیه
نیفرین دئدی
حارام اولسون سیزه منیم
آدیم ، سانیم
آی بئ غئیرت اوغوللاریم
((مورو)) داغی دوشمن باسیب
((کلبجریم)) یارالیدیر

باتدی منیم آدیم سانیم
باسیلیبدی قاراباغیم
نه یاتیب سیز عارسیز-عارسیز
دده قورقود بویلاریندا
اؤلدو داها ((قارا چوبان))
یالان اولدو دلی (( دومرول))
حاییف اولسون او آدلارا
حاییف اولسون

تاریخ دولو شان شوهرتلی
آدا ، سانا
دوشمن باسدی قاراباغی
نه قاراباغ؟
تالاییبللار هر وارلیغی
عارسیز-عارسیز
خوش خیاللی
شیرین یوخو،
یوخلاییب سیز...
حارام اولسون اوستوزده کی
آد ، سان سیزه ،

اوغوز بابام دئدی گئتدی!!!
آت کیشنه دی آت کیشنه دی
چنلی بئلین سیلدیریم لی
اوچوروم لو یوللاریندا
قوچ کوراوغلو نعره چکدی
کور اوجاغلی یوردوم دئدی!!!
غئیرتیمه گولدو منیم!!!

آت کیشنه دی ساوالانین زیروه سینده
آل گئییملی اولو بابک سسه گلدی
باخدی منه غضب لندی ،
سیز قانیمی آیاقلادیز ،
قاراباغدان چکیلنده...
دئدی منه ، دئدی گئتدی

آت کیشنه دی خان آرازین ساحیلینده
کیشنه سینه نبی گلدی،
یوردوموزو بؤلوم-بؤلوم
قاریش -قاریش ، دیلیم-دیلیم
دوغراییب لار گؤره ن آندا،
بیزه نیفرین ائدیب گئتدی...

آت کیشنه دی شاه سهندین اتگینده
ستارخانین اولکه سینده
کئچمیش لریم یادا دوشدو
واراق - واراق واراقلادیم تاریخی ،
تاریخلرده بابالاری ایزله دیم
اونلار سولطان ایمیش
اونلار خان ایمیش
اونلار داهی اینسان
غئیرت اوجاغی
من ایسه قول اولموشام
قول...!!!!

آزربایجان اوغلویام

آزربایجان اوغلویام

گئـچیب جـاندان اؤز ائلیـه جـان وئره ن
بابکم من آزربـایجــان اوغلویـام
آنـا یوردا اوره کدن عئشق بسلــه یه ن
بـابکم من آزربـایجــان اوغلویـام
ایللــر بـویـو ، جـللاد بـوینـو بـورمـوشام
سینـه گـریب دوشمـه نیمـی یورموشام
ائللریمیــن خـیــدمتینــده دورمـوشــام
بـابکم من آزربـایجــان اوغلویـام
بـاغلی قوللا معتصــم'دن قــورخمــادیم
اؤلوم گلدی من سؤزومدن چـیخمادیم
آل قانیمی مه یر اوزه یـاخمادیم
بـابکم من آزربـایجــان اوغلویـام

تـاریخیمــی آل قــانیمــلا یــازمیشــام
قودوزلارا دریــن قـبیر قــازمیشـام
کیم دئییری من یولومو آزمیشام
بابکم من آزربـایجــان اوغلویـام

هوندور داغـام سئللــر منــی ییخـمادی
دوشمنیم ده اوزومه خــور بـاخمادی
آخدی قانیم گؤز یاشلاریم آخمادی
بـابکم من آزربـایجــان اوغلویـام
سینمــده بیر یـانـار اود وار سـؤنـولمـه ز
شرف یولو گئده ن یـولچو دؤنولمه ز
محببتیم ائللــریمــــــــدن اوزولمـــــه ز
بـاشـی اوجـــا آزربـایجـــان اوغلویـام

قودرتیمی اؤز ائلیمدن آلمیشــام
چـراغ اولـوب قــارانلیقــدا یــانمیشــام
ظفـر مـــارشــی وطنیمــده چالمیشـام
بـابکم من آزربـایجـــان اوغلویـام
توران بــدن آزربـایجــان جــانیمدیـــر
تـورکو دیلــی دامــارلاردا قــانیمدیــر
بورا منه وطنیمــدیــر شانیمــدیـــر
بـابکم من آزربـایجــان اوغلویـام

کونلوم ایستیر گلسین هر یاندان آزربایجان سسی

سیاه

کونلوم ایستیر گلسین هر یاندان آزربایجان سسی
سسله ننده جان باغیشلیر جانلارا جانان سسی
ایلقارا آند ایچمیشیک بیز، اولدو واردیر دوندو یوخ
تا آزربایجانلی وار باتماز آزربایجان سسی
ایندی یوخ دعواسی ایرانیله تورانین داها
قورخودا افراسیابی رستم دستان سسی!!
ایندی هر دیلده هر آیینده بشر صلح آختاریر
خلقه خوش گلمیر داها شمشیر سسی قالخان سسی
ایسته مز فردوسی شاهلاردان بیزه داستان دئسین
ایندی خلق ایستیر کسیلسین هاردا وار سلطان سسی
ایندی آزادلیق یولوندا قهرمانلار جان وئریر
کار ائده ر مخلوقی چیخسا بیر بئله قوربان سسی
سانما ستارخان یاتیبدیر قورخودان سسلر باتیب
ایندی ستارخان ائلینده چوخدو ستارخان سسی
قلعه سینده بابکین سس باتماییبدیر ایندیده
واردی دائیم بابکیله باغلانان پیمان سسی
تولکو اصلان اولمایان یئرده اوزون سلطان بیلیر
الفرار ائیله ر اوزاقدان دینله سه اصلان سسی
قوربانام آنجاقکی آذربایجانین جانیندا
چونکی اوندا آزر و بایدا سونرا واردیر جان سسی
موسیقی آلتلریندن جوربه جور سسلر چیخیر
شور سسی، زابل سسی، شیراز و دشتستان سسی
سانکی قارمان دیل آچاندا اوز دیلیمده دیل آچیب
دیلله ننده روحوما لای- لای دئییر قارمان سسی
سورتوشور آرشا کمانه توققوشور مضراب تارا
گه اولور صحبت وصالدان گاه گلیر هجران سسی
لزگی رقصی باشلاناندا ناغارالار فریاد ائدیر
شاپپالار ده یدیکجه گومبولدور گلیر طوفان سسی
هر زمان کر دسته سی برنامه سین اجرا ائدیر
بولبولی حیران ائدیر قیز سسی اوغلان سسی
بو گوزللیکده ((سخا)) انصاف دئییل سسلر باتا
تا آزربایجانلی وار باتماز آذربایجان سسی