یاشا وطنیم یا شا آذربایجانیم

گؤزون بیر سئوگیلی ،

ایستکلی گؤرسه ،

روحون سئوسه ،

سوندان گلر دیوانه لیک .

من کی سنی گورمه میشم ،

سئومه میشم ،

سنه عاشیق اؤلمامیشام ،

ندن بئله دیواننم ای “آزادلیق”

یاشا وطنیم یا شا آزربایجانیم

ائلیمین اوبامین سازینا بندم

ائلیمین اوبامین سازینا بندم
ظولمه باش اَیمی‌ین قئزینا بندم
گورمه‌لی قئشینا یازینا بندم
الدوزلار ایچینده دان اولدوزویام
افتخاریم بو دور آذر قئزییام

بینامی قویوبدور عشقیله آنام
اویره‌دیب ائلی مین دردینه یانام
اولکه‌می عزتیم شرفیم سانام
الدوزلار ایچینده دان اولدوزویام
افتخاریم بو دور آذر قئزییام

کوکومو قازمالار، قورودا بیلمز
اوزگه‌لر دیلیمی اونودا بیلمز
سوزو دوشونمی‌ین، بونودا بیلمز
اولدوزلار ایچینده دان اولدوزیام
افتخاریم بو دور آذر قئزییام

قوربانام آدینا آذربایجانین
یورغون اولادینا آذربایجانین
ائل چاتسین دادینا آذربایجانین
الدوزلار ایچینده دان اولدوزویام
افتخاریم بو دور آذر قئزییام

من آزربایجانام ، آزربایجانام

 

من آزربایجانام ، آزربایجانام
یارالی توپراغام یارادیر سینم
آغ بیر گؤیرچینم باریشیق قوشو
اووچولار الین دن یارالی یام من
ایکی قانادیم وار اوچا بیلمیرم
بیری یارالی دیر
بیری باغلی دیر
من آزربایجانام دوستلوق دونیاسی
من آزربایجانام باریشیق سسی
دیلیمی کسیب لر قاداقدان منیم
بیر اوغول آناسین دوغرایان کیمین
آراز قیلینج لاییب سینه دن منی
یارالی توپراغام یارام قان وئریر

سانکی آنا قوجاغیندا بیر کؤرپه کیمی
یارالی قاراباغ، بالام جان وئریر
دوشمنلر الینده اسیردی بالام
جان وئریر قاراباغ یامان جان وئریر
ایگید بیر اوغلوم وار آدی قاراداغ
اون سککیز ماحاللی آدلی سانلی دیر
اودا اسیر دوشموش اودا اسیردیر
اونوندا چوخداندیر قوللاری باغلی
اونوندا آرازدان یوللاری باغلی
قاراباغ-قاراداغ حسرت داستانی
یارالی توپراغام آذربایجانام
سینمده یارا وار تام آراز بویدا

آغ بیر گؤیرچینم یارالانمیشام
هر زامان-هر زامان یارام تازادیر
تاریخلر بویونجا من یارالی یم
کؤهنه یارالاریم تازا قان وئریر
یاریم او تایدادیر- یاریم بو تایدا
سئوگیم او تایدادیر یاریم او تایدا
حسرت چلنگیمی آلان اولمادی
سولدو اللریمده چیچک لر منیم
هاراییم بوغولوب ایچیمده منیم
محو اولوب اوره کده مینلرجه آرزوم
آرزوسو گؤزونده قالان لاردانام
ایکی قانادیملا اوچا بیلمیرم
ایکی یه بؤلونن آزربایجانام
سینه سی آل - قانلی آزربایجانام.

نه ساغ گؤزونه تاخیلان اوخ، نه آلنینی شاققالایان قیلینج،

نه ساغ گؤزونه تاخیلان اوخ،

نه آلنینی شاققالایان قیلینج،

نه کؤکسوندن-

فیشل- فیشل قان فیشقیردان

قورقوشوملار

آیاقدان سالمادی قهرمانیمی!

تکجه کوره‌ییندن،

آخ… کوره‌ییندن

قفیلدن آچیلان خیردا بیر یارا

نئجه جان اوزوجو،

نئجه دؤزولمز اولدو….

دونن بئله ایمیش،

بوگون ده بئله،

هله بلکه صاباح‌دا بئله!!

 

قورتولوشون یوُلو اوزون ،

قورتولوشون یوُلو اوزون ،

گاهدان هوُندور، گاهدان هامار ،

یوُل اوزونو آددیم باشی تیکانلار وار،

پوچاق کیمی کئسیب یاخان داشلاردا وار،

کوُل دیبینده پوسکو قورموش تولکولروار ،

... دره لرده سوُرو ـ سوُرو چاققاللاروار ،

یوُلا بئنزر اوچروملار وار ، دره لروار ،

آزادلیقین چئشید ـ چئشید دوشمانی وار ،

بویوُل گئدیرگوُن دوُغانا ، ایشیق لیقا ،

بو یوُل گئدیرآزادلیقا ، قورتولوشا ،

یورغون ارک ایله دئیشمه

یورغون ارک ایله دئیشمه
بیر ایستی یای آخشامیدی. قارشی قارشیا دایانیب دانیشیردیق، گونشین باتماسینا آز قالیردی. منیم سیرتیمنان ووران گونش ایشیقی اونون گوزون قاماشدیریب و اوزونون قیریشماسینا سبب اولوردو. بیر گوزون یوموب بیر گوزو ایله منه باخیردی. منده اوجا سسله بیر قاضی کیمی اونو محاکمه ائدیب و باشینا قیشقیریردیم. اما او چوخ آرام و متانت له منیم جوابیمی وئریردی بئله آراملیغی منی داها هیرسلندیریردی.
سونوجدا چوخ هیرسلنیب اوستونه باغیردیم کی گوزونو آچ ایکی گوزونله منه باخ اوزوون قیریشیغین آچ منه جواب وئر.
سویله دی: بیر آتدیم ساغا گل بیر قدم دالی گئت. گونش تامامی ایله دالیندا قالسین اوندا منده گوزومو آچیم اوزومون قیریشیغی دوزلسین.
دئدیکلرینی ائله دیم، گوزو آچیلدی اوزونون قیریشیغی دوزلدیآمما ایندی او منه هیرسلندی. دئدی منه نه وئریبسیز آلانمیرسیز؟ ندن هر گون گلیب منی بوردا محاکمه ائلیرسیز؟!! سئل سو قاباغیندا دایاندیم، زلزله نین کوره یین یئره ووردوم، توپ تفنگ لر قاباغیمدا تسلیم اولدو، بولدزرلرین موتورون دایاندیردیم، داها نه ائتمه لیدیم؟!!
آمما سیز نه ائتدینیز؟!! هر گلنه بویورون دئدیز هر گئدنه الله آمانیندا سویله دینیز.
دئدیم: بیز؟!!، منظورون کیملردی، منکی تکم، ندن منه سیز دئییرسن؟!!
دئدی هر گون آخشام مین لرجه جوان سنه تای گلیب بوردا منیمله دانیشار. سانما کی دوشونن یالنیز سن سن، هاممی دوشونور، یاخجی دا دوشونور آمما تاسفله عمل ائلین یوخدو

باکی ایله تبریزین آراسیندایام

باکی ایله تبریزین آراسیندایام
منیم قیسمتیمدیر آلا تورانلیق

گئجه یله گوندوزون آراسیندایام
قورولور ایچیمده میزان- تره زی
او گوزله بو گوزون آراسیندایام
یوللار آیریجیندا چوخ تالانمیشام
فیکیرلر الینده هاچالانمیشام

تپه دن قورخموشام، دوزو دانمیشام
ایندی داغلا دوزون آراسیندایام
ایلیشیب قالمیشام غم چالاسیندا
بیر گوزه ل تیلیسمین داش قالاسیندا
همیشه دهلیزین آستاناسیندا
باییرلا دهلیزین آراسیندایام
بختیار سینه دن نئچه من کئچیر
بیری دردلی کئچیر، بیری شن کئچیر
مفتیللی چپرلر سینه مدن کئچیر
باکیلا تبریزین آراسیندایام

تورکجه یازیلی شئکیلئر

یاسلی ساوالان

یاسلی ساوالان

هر زامانکی باخیرام باشینا قاروار گؤرورم
اوغلو اؤلموش آنا تک گؤزلرین آغلار گؤرورم
هر طرفدن چکیلیب سینه‌وه داغلار گؤرورم
آی آلان اوستونو غم چیسگینی، هر یانی دومان
آی یاغان باشینا غملر اودو، یاسلی ساوالان

گؤرموشوک یازدا کؤچک­لرده چیچکلر آچیلار
هر طرفدن چیمنین سینه­سینه گول ساچیلار
ماهنی­لار قوشماغا باشلار یئنه­ده قوشماچیلار
یاز گلیب گئتدی یئنه گولمه­دین اوچ آیدا بیر آن
آی یاغان باشینا غملر اودو، یاسلی ساوالان

قرنیلر کئچدی سنین گولمه­دی بیر لحظه اوزون
قانلی یاش تؤکدو سارالمیش اوزونه یاشلی گؤزون
غصّه­دن دؤندو قارانلیق گئجه اولدو گونوزون
نه سوران حالینی اولدو نه وئرن جیسمیوه جان
آی یاغان باشینا غملر اودو، یاسلی ساوالان

اولو بابک وئریر فرمان

اولو بابک وئریر فرمان

دالغالانیر قوجا وولکان

وارلیغینی هایقیریری

اودلار یوردو آزربایجان - آزربایجان

ایگید قیزلار قوچ اوغلانلار

گله جه یه اینانانلار

یئنی دؤوران یارادانلار

یورویورلر سانکی آسلان - آزربایجان

پولاد کیمی بیلک ایله

خوش آرزویلا دیلک ایله

سئوگی دولو اوره ک ایله

هره ییلماز بیر قهرمان - آزربایجان

وقتسیز سولان گولوموزه

دوستاق اولان دیلیمیزه

قارا گونلو ائلیمیزه

شانلی بابک اولوب عونوان - آزربایجان

ده ده قورقود نفسىدیر

کور اوغلونون نعره سىدیر

ستارخانین گولله سىدیر

بذ قالاسی اولوب مئیدان- آزربایجان

مین ایللرین سولطانىسان

قورتولوشون فرمانىسان

آزادلیغین عونوانىسان

آزربایجان ، آزربایجان – آزربایجان