اوچ اپیزود
گئچیر خیاواندان اونلار آرابا
آداملار تلسیک گلیب گئتمه ده
بیر جاوان قادینلا بیر کؤرپه اوشاق
گئدیرلر اَل اَله آداملار ایچره
آناسی بَرک توتوب کؤرپه قیز اَلین
قورخور کی آرابا اونا توخانا
بوشلانا خیردا قیز یا کی الیندن
باخیر اؤرکک اؤرکک اویان بویانا
***
ئچه ایل سؤوشوب قیز اولوب جاوان
دیمکی عادتی آنا باشیندا
گئنه ده کئچه نده خیاوانلاردان
توتور تئز قیزینین الینی آنا
باخیب قیز اؤزؤنه آنانین گؤلؤر
« آنام منی هله ده بیر اوشاق بیلیر! »
***
فصیل لر اؤتؤشوب ایللر دولانیب
قیزا دا زامانین توزی جالانیب
ایندیسه گئچه نده خیاوانلاردان
گؤرنده آرابا دای یاخینلاشیر
قیز اؤرکک باخیر اویان بو یانا
یاپیشیر آنانین قوجا الینی
آناسی فیکر ائلیر بو دئورانیشا
کئچمیش یای یازا پاییزا قیشا
گؤلومسیر قیزینین جاوان اؤزونه
کئچه ن خاطیره لر گلیر گؤزؤنه
عجیبه ائوچیک دیر غریب اویونچاق
ایندی قیز آنادیر، آناسی اوشاق
بیر گون
نه شعیر اولاجاق،
نه بو آنالوگ سئوگیلر،
نه بو دالغالار؛
مین بیر ناغیلدان سونرا
آغیزلاردا بو دئییلهجک:
وار ایدی
یوخ ایدی
یوخ ایدی
وار ایدی.
بیر گون
ناغیل اولاجاق؛
نه سن اولاجاقسان،
نه من…!
وهاب حاجی زاده
سن زولفینی آچ تؤک اوزونه ، شانه سی مندن
زنجیری نشان وئر منه ، دیوانه سی مندن
سن عاشیقی یاندیرماقا من یانماقا ماییل
سن شمعینی گؤستر منه پروانه سی مندن
زولفون قدری عاشیق اولان وار سنه ای گول
سن سویله او مجنونلاری افسانه سی مندن
سر مست گؤزون فتنه لبین نشئه لی باده
ایچدیر منه ، اول باده نی پیمانه سی مندن
سن ناز ایله گل کی صدفین قیمتی آرتسین
گؤز یاشی کیمی اینجیسی دوردانه سی مندن
هر دم گؤتور اوزدن گوزه لیم افعی زولفین
چک ظاهره گنجینه نی ویرانه سی مندن
اویالانچی ایللر گونه دیمزمیش
گول وئردیم،وئردیییم گوله دیمزمیش
گوزوم ده چاغلایان سئله دیمزمیش
حئیف او سئوگییه ، او محبته